பிரபல பாலிவுட் நடிகர் அமிதாப் பச்சன், நடிகை ஜெயாவுக்கு திருமணமாகி இன்றுடன் 48 ஆண்டுகள் ஆகிறது. இதையடுத்து பலரும் அவர்களுக்கு வாழ்த்து தெரிவித்து வருகிறார்கள்.
பாலிவுட் நடிகை ஜெயாவை தான் திருமணம் செய்து கொண்ட சுவராஸ்யமான சம்பவம் குறித்து அமிதாப் பச்சன் சமூக வலைதளத்தில் தெரிவித்திருந்தார்.
அமிதாப் பச்சன்
பிரபல பாலிவுட் நடிகர் அமிதாப் பச்சனுக்கும், நடிகை ஜெயாவுக்கும் கடந்த 1973ம் ஆண்டு ஜூன் மாதம் 3ம் தேதி திருமணம் நடந்தது. அவர்களுக்கு ஸ்வேதா என்கிற மகளும், அபிஷேக் என்கிற மகனும் இருக்கிறார்கள். அதில் அபிஷேக் பச்சன் தன் பெற்றோர் வழியில் நடிகராகிவிட்டார். இந்நிலையில் அமிதாப் பச்சன், ஜெயா இன்று தங்களின் 48வது திருமண நாளை கொண்டாடுகிறார்கள். அவர்களுக்கு திரையுலக பிரபலங்களும், ரசிகர்களும் சமூக வலைதளங்களில் வாழ்த்து தெரிவித்துக் கொண்டிருக்கிறார்கள்.
திருமணம்
சமூக வலைதளங்களில் தங்களை பலரும் வாழ்த்திக் கொண்டிருப்பதை பார்த்த அமிதாப் பச்சன் நன்றி தெரிவித்து ட்வீட் செய்துள்ளார். முன்னதாக ஜெயாவுக்கும், தனக்கும் திருமணம் நடந்தது பற்றி அமிதாப் சமூக வலைதளத்தில் கூறியதாவது, ஜன்ஜீர் படம் வெற்றி பெற்றால் நண்பர்கள் சிலருடன் முதல்முறையாக லண்டனுக்கு செல்ல வேண்டும் என்று முடிவு செய்தோம். யாருடன் லண்டனுக்கு செல்கிறாய் என்று என் அப்பா கேட்டார். ஜெயாவின் பெயரை சொன்னதும், அந்த பெண்ணை திருமணம் செய்து கொண்டு லண்டனுக்கு செல், இல்லை என்றால் செல்லக் கூடாது என்றார்.
ஜெயா பச்சன்
அப்பா பேச்சுக்கு மறுபேச்சு ஏது. உடனே எனக்கும், ஜெயாவுக்கும் திருமணம் நடந்தது. அவரை மனைவியாக்கிய பிறகே லண்டனுக்கு சென்றோம் என்றார் அமிதாப். ஜெயா பற்றி அமிதாப் பேட்டி ஒன்றில் கூறியதாவது, என் மனைவி என்னை போன்று இல்லை. அவரும் திரைத்துறையை சேர்ந்தவர் என்பதால் நான் கொடுத்து வைத்தவன். என் தொழில் அவருக்கு நன்கு புரியும். அவர் என் வாழ்வில் வந்தது ஒரு வரம் என்றார்.
சினிமா
ஜெயா பற்றி அமிதாப் பச்சன் மேலும் கூறியதாவது, திரைத்துறையை சேராத ஒரு பெண்ணை மணந்திருந்தால் என்னவாகியிருக்கும் என்பது தெரியவில்லை. இந்த துறையில் திருமணம் நிலைக்காது என்பார்கள். ஆனால் என்னை எப்படி அதில் சேர்க்க முடியும்?. ஜெயா அவராக இருக்கிறார். நான் நானாக இருக்கிறேன். இது தான் எங்கள் திருமணம் நிலைக்க காரணம் என்றார்.